Intala Rakkoon Marfamte

Gurbaa tokkoofi intala takkatu bultii jaaranii wajji jiraatan. Daa’ima baatii 4 qaban. Inni shofeera makiinaa Euro truckeraati. Yeroo tokko meeshaa fe’ee yoo bahe, hanga baatii 2 ala turuu danda’a. gaafa jaartiin isaa ilmoo dhaltu hojii dhiisee isii wajji dhama’aa ture. Abbaan makiinaa ammoo waan Kanaan hedduu dallane. Sababaa san mallaqa guddaa kasaare. Dallansuu saniin gurbaa kana hojii irraa ari’ee shofeera biroo qaxare. Gurbaan kun ilmoo argachuu isaatiin haalaan gammadus, dalagaa dhabee manatti deebi’uu isaatiif hedduu gaddee cinqame. Saahibban isaa hundatti bilbilatee dalagaa naa barbaadaa jedheen.

Zamana kana keessatti ilmoo guddisuun dubbii laaftuu miti. baasii heddu barbaachisa. yeroo inni mallaqa dhabe kanatti daa’imni haarofni dhufee cinqaa hamtuu keessa isaan galche. Jaartiin isaatis hedduu cinqamte. Ofii baatee dalaguu hin dandeessu. Daa’ima baatii Afurii harkaa qabdi. Inni ammoo dalagaa dhabee manatti deebi’e. kiraa manaa wan baatii lamaa hin kafalle. Abbaan manaa guyyarraa dhufee mallaqa fidaa jedhee gaafata. Yeroma xiqqoo nuuf obsi jedhanii kadhatanii ofirraa deebisan. Boodarra abbaan manaa obsa dhabee ka’aa narraa bahaa jedheen. Miila jalatti kufanii kadhatanis homaa dhagahuu dide. boru ganama mana kana keessatti isin arguu hin qabu jedheen.

Mallaqa dhabanii waan hedduu rakkataniif, haati nyaata gahaa hin argattu. Sababaa kanaaf harmi haadhaatis annan daa’ima quubsu hin mirgu. Daa’imni harma goggogaa xuuxaa oolee waan bu’uuf dhabee iyya. Haati ammoo waan gootu wallaaltee ciistee imimmaan dhangalaasti. Abbaan daa’imaa waan kana argee obsa dhabe. Daa’ima beelawee iyyuufi, jaartii isaa tan mala wallaaltee imimmaan gadi nayxu argee hedduu qalbii cabe. As taa’ee ija tiyyaan waan kana hunda arguu irra, yoo xiqqaate manuma kanaa gad bahee xiqqoo hara galfachuu naaf wayya jedhee ka’ee manaa bahe. Manaa bahuu malee gara deemu hin beeku. Eega haalaan manarraa fagaatee booda, karaa irraa achi maqee gaaddisa tokko jala taa’e.

Qaamaan manarraa fagaatus qalbiin isaa mana jirti. yoona daa’imni kiyya akkam tahe laata? Jaartiin tiyya hoo akkam taate laata? Yaa Rabbii kiyya furmaanni kiyya maali? Mee maatii kiyyaaf akkamuma haa tahu jedhee ofitti haasawa. Osoma inni taa’ee yaada sammuu keessa oofu Azaanni zuhrii azaaname. innis bakka taa’uu ka’ee gara masjiidaa deemee salaate. Zuhrii booda sunnaa raka’aa lamaa itti dabalee eega salaatee booda, sujuuda booda keessatti du’aa’ii jabduu godhe. Yaa Rabbii kiyya, an si malee ilma namaa hin abdadhu. Ilmoo tanas situ naaf kenne. Isiniifi ilmaan keessanis anatu Razaqa jettee ahdii nuuf seentee jirta. Ati akka ilma namaa ahdii hin diiydu. Yaa Rabbi na dhaqqabi. Rakkoo tana keessaa na baasi” jedhee onneerraa du’aa’ii godhe. Salaata isaa xumuree ka’ee masjiidaa bahe. Eega ganamaatii faxara hin nyaanne. Saa’aan laaqanaatis dabree jira. hedduu beelawee cinqame. “Eega an akkanatti beelawe, daa’imni kiyya hoo akkam taha laata? Yaa Rabbi furmaataan na dhaqqabi” jedhe.

Saahibni isaa tokko hulaa masjiidaa duraa suuqii qaba. Wayta masjiidarraa bahu suuqii saahiba isaa achi laalee arginaan, “Saahiba kiyya kanarraa mallaqa xiqqoo liqeeffadhuu laata?” jedhee of gaafate. Yoo na dhoorgates na haa dhoorgatu. Maatii kiyyaaf jecha waan barbaachisu hunda nin godha jedhee suuqii saahiba isaa ol seene. Yoo inni ol seenu Saahibdichi isaa “Allaahu akbar, Allaahu akbar” jedhee lafaa ol ka’e. eega ganamaatii telefoona kee irratti bilbilaa ture. Garuu telefoonni kee naaf dalaguu dide. akkamitti dhufte har’a. eega suuqii tiyya dhufuu dhiistee turtee bar” jedheen abbaan suuqii. Gurbaan ni rifate. “Har’a haajaa akkamiitiif natti haajamte. Amma dura naaf bilbiltee hin beeytee bar” jedheen. Abdurrahiimtu shofeera akka keetii hojii ariifachiisaaf barbaadutti jira. meeshaa sa’aa kanatti deemuu qabutu jira. yoo meeshaan kun har’a asii bahuu baate mallaqa guddaa kasaaruuf deema. kanaaf fardaa lafoon si barbaadutti jirra jedheen. Gurbaan hojii dhabe kun akka malee gammade. Du’aa’iin tiyya qeebalamuuf deemti natti fakkaata jedhee qalbii of gammachiise. “Shofeerri isaa maal tahe?” jedhee gaafannaan, “Shofeerri isaa eda galgala hidhame. Maaliif akka hidhanis hin beeyne. Abdurrahiim hidhaarraa hiiksisuuf hedduu yaalii godhee dadhabe” jedheen.

Osoma isaan wajji haasayutti jiran Abdurrahiim ol seene. “Shofeerri ati barbaaddu kunooti Abdurrahiimoo, osoo goda meeqa seenne barbaannu ofumaa dhufe” jedheen. Abdurrahiim hedduu gammade. “Yaa oobboleessa kiyya na dhaqqabi. Mindaa baatii tokkoo dursee amma harkatti siif kafala. Gaafa meeshaa kana geessitee deebitus mindaa baatii tokkoo siif dabala. Yoo hagasitti shofeerri kiyya hiikame, yoo ati fedhii qabaatte siif dalagaa biroo siif kenna. Yoo shofeerri kiyya hiikamuu baate ammoo dalagama kana itti fufta” jedheen. Gurbaanis carraa argate gammachuun qeebale. Abdurrahiim mindaa baatii tokkoo achumatti laakkayee itti kenne. “Yoo dandeeyse galgala sa’aa 2 dursii bahi” jedheenii biraa deeme. Gurbaan mallaqa fudhatee fiigichaan gara mana ofii qajeele. Akkuma ol seeneen mallaqa fidee dhufe jaartitti kennee gammachiise. Jaartiin isaatis lafaa ol utaaltee gara suuqii deemtee waan muraasa bittee deebite. Hoggasuma nyaata gootee nyaatanii quufan. Daa’ima isiitis harma hoosistee qubsitee raffiste.

“Mallaqa kanarraa waan kiraa manaa fuudhii namtichatti kenni” jettee jaarsa ofiitti himte. Innis mallaqa fuudhee gara mana namtichaa deeme. Hulaa dhaddhoofnaan abbaan manaa itti gad bahe. “waan sirraa tursiisneef dhiifama. Kunoo mallaqa siif fidee jira” jedhee itti hiixate. Abbaan manaa garuu waan jedherraa if booda hin deebine. Mallaqa irraa fuudhee cinaa fudhatee cinaa itti deebise. “kunoo waan ji’a tokkoo isiniif dhiisee jira. edanuma narraa bahaa. Argaa keessan hin fedhu. Nama biroo kan gatii guddaan kireeffatu argadhee jira” jedheen. Gurbaan hedduu kadhatus namtichi ni dide. achi booda gara mana ofii deebi’ee waan namtichi jedhe hunda jaartii isaatiif hime. “An edana dalagaaf meeshaa fe’ee baha. Kophaa kee daa’ima wajji namticha kana biratti si dhiisee hin deemu. Meeshaa hunda mana obboleettii tiyyaatti guurra. Dallaalaa dubbisee mana akka nuuf barbaadu goona. Edanaaf firaasha kana qofa asitti dhiisna. Galgala kana as bultee boru ganama asirraa godaanta” jedheen. Isiinis carraa biroo waan hin qabneef tole jette.

Akkuma jedhan meeshaa hunda mana obboleettii isaatti guuranii firaasha tokko qofa achitti dhiisan. Gurbaanis galgala ka’ee karaa bu’e. halkan naannoo saa’aa 5tti daangaa biyyaatti dhihaatee, jaartii ofiitiif bilbile. “Habiibtii networkii keessaa bahutti jira. in shaa Allaah booda telegram irratti wal argina. Ammaaf networkii hin qabuu nagayatti” jedheen. Yeroo inni bilbiluuf kana daa’imni akka malee booya. “maali daa’imni maal ta’e?” jedheen. “wanti inni ta’e naaf hin galle. Qaamni akka malee oowwa. Harma hodhee yeroma san haqqisa. Garaanis ni baasa. Waan godhu wallaalee wajji dhama’utti jira” jetteen. “maal eeyda ree, ka’ii haakima geessi kaa. Taaksii bilbilii yaamadhuu daddafii deemi” jedheen. Isiinis tole jettee taaksii yaamattee gara hospitaalaa deemte. Jaarsi isiitis imala itti fufe.

Intalti tun hedduu hamilee cabde. Jaarsi isii dalagaa argachuun isii gammachiisus, yeroo rakkinaa kanatti fagaatee biraa deemuu isaatiif hedduu yaaddoyte. Mana haaraya argachuunis ni jabaata. Daa’ima baatii afurii wajji olii gad deemtee mana barbaaduu hin dandeessu. Waan gootu wallaaltee hedduu cinqamte. Obboleettiin jaarsa isii naannoma isaan jiran kana qubatti. Garuu Jaarsi isii hedduus nama hin jaalatu. Kanaaf yeroo hunda irraa fagaatanii jiraatan. Xiqqoo booda daa’imni wal’aansa argatee woyyaawe. Daa’imni woyyoofnaan taaksii keessa seentee gara manaa qajeelte. “Yaa Rabbii kiyya, maaluma diliin tiyya. Maaliif rakkoon wal gubbaan natti deddeebite. Maaliif cinqaa nutti baay’iste jettee of keessatti hoosoyte.

Yoo mana bira gahan waan addaa argan. Makiinaa poolisii lamatu mana isaanii bira dhaabbata. Poolisoonnis Waraqaa Barricade itti marsanii qorannoo irra jiran. Manni isaan galan karaa irra jira. makiinaan tokko osoo mana isaanii biraan dabru karaa irraa maqee mana isaanii keessa seenee jira. intalattiin waan kana argitee akkaan rifatte. Qaamni isii akka nama busaan qabee hollata. Waan dubbattu wallaate. Osoo sa’aa san jarri mana san keessa jiraatanii, hundi isaanii ni dhuman. Makiinaan mana caccabsee qaama walakkaan ol seenee walakkaan ala jira. jidaarri manaa diigamee makiinaa gubbatti kufee jira. shofeerri makiinaa keessa ture lubbuun hafuu isaa Rabbumaatu beeka.

Intalattiin daa’ima ofii taaksii keessatti dhiistee, makiinaa keessaa gad buutee Rabbii isiitiif sujuudde. Yaa Rabbi galanni si haa gahu. Ka dhukkuba daa’ima kiyyaa sababaa gootee manaa na baaste. Ati rakkoo nutti deemtu ta nuti quba hin qabne beeyta. Nuti waanuma ijaan arginu qofa beeyna. Tola keetiin kunoo lubbuun hafee as dhaabbachutti jira. daa’imni kiyyas nagaya. Anis nagaya. Jaarsi kiyyas nagaya naaf qaba. Tola keetiin kunoo nuti hundi lubbuun jirra jettee Rabbii isii galatoomfatte.

Hojiin Rabbii guddaa hundi sababaa qaba. Yoo qalbiin xiinxallan hundi miidhagina of dandahe qaba. Intalti tun yoo duraa Rabbii isii komataa turte. Abbaa manaatis mallaqa itti kennanii hedduu kadhatan. Rabbiin qalbii isaa jabeeysee akka didu godhe. Jaarsa isitis dalagaa itti banee akka gandarraa fagaatu godhe. Da’ima isaanitti dhukkuba darbee akka manaa bahan dirqamsiise. Haala Kanaan lubbuu isaanii oolche. Meeshaa isaanitis baafatanii jiran.Nutu hin argine malee tolli Rabbii guddaa kallattii hundaan nu marsee jira. tika Rabbii guddaatiin baanee galla. Rahmata isaatiin jiraanna.

Dubbii jabduu takka isiniif hima. Xiyyeeffannaan na hordofaa. Ijji ilma namaa digrii 45 qofa argiti. Digriin 315 guutuun nu jalaa dhokatee jira jechuudha. Rabbiin guddaan digrii 360 guutuun nu arga. Gubbaafi jalaan, bitaafi mirgaan, kaabaafi kibbaan, kallaattii hundarraan nu arga. Waan nuti dalaynuu mitii, waan nuti qalbii keessatti yaannu beeka. Waan mudachutti jiruu qofaa miti, waan nu mudatuuf deemus ni beeka. Waan dhabnee sababaa san miidhamutti jirru qofa osoo hin tahin, waan achi booda argatuuf deemnu hunda beeka. beekumsa isaatiin maletti baalli takka hin harcaatu. Beekumsa isaatiin maletti qoreen takka nu hin waraantu. Murtii isaa malee wanti takkallee nu hin tuyxu. Rahmata isaatiin dachii tanarra bobbaana. Tola isaatiin rizqii argannee jiruu nagayaa jiraanna. Dubbii tana laaftutti hin laalinaa.